Contoh Geguritan Bahasa Jawa – Geguritan di daerah Jawa berkembang dari tembang, sehingga dikenal beberapa bentuk tembang yang berbeda-beda. Pada awalnya, tembang berwujud nyanyian dan memiliki sajak tertentu itu dibuat oleh para penyair untuk dipersembahkan kepada pemimpin yang berkuasa.
Inilah yang menyebabkan karya sastra Jawa klasik berbentuk puisi tersebut bersifat anonim. Pada umumnya, penyair yang membuat tembang tidak ingin menonjolkan dirinya dan karyanya dianggap milik bersama.
Pengertian geguritan di Jawa kemudian berkembang dan memiliki sinonim puisi bebas, yaitu puisi yang tidak mengikatkan diri kepada aturan metrum, sajak, dan lagu.
Berikut akan dipaparkan contoh geguritan bahasa Jawa dengan tema kehidupan atau lingkungan sekitar, yang diambil dari buku Antologi Geguritan Kidung Karangkitri terbitan Dinas Kebudayaan daerah Istimewa Yogyakarta tahun 2020.
Daftar Isi
Contoh Geguritan Bahasa Jawa
Berikut ini adalah beberapa contoh geguritan bahasa Jawa yang dapat kamu baca terkait tema kehidupan maupun lingkungan sekitar, simak informasi berikut.
Candhi Prambanan (Nurlistiyati)
Candhi Prambanan
Panggah jejeg ing bumi Mataram
Sansaya endah lan merak ati
Kawentar sinawang rina klawan wengi
Candi Prambanan
Nut simbah ujare
Sela kang gagah pideksa mau
Minangka seksi
Bandhung Bandawasa lan Roro Jonggrang
Sih tresna kinalang satru
Hamung palastra sulaya kang mungkasi lelakone
Genti madeg candhi kang sulistya
Dongeng mung tekan ujare simbah
Sejatine kabeh mung crita karangan
Minangka rerenggan nggo ngenthengi sanggan
Dadi dongeng kanggo paesing sela
Candhi Prambanan
Sineksen wektu
Dadi jujugan para manca
Gumun anyekseni sulistyane
Mugiya lestari ing salamiya
Sega Gudheg Sepincuk (Tri Wahyuni)
Bocah cilik iku mung manthuk
Aweh sasmita, tanpa swara
Apa dheweke wanuh?
Yen ing tanah klairane iki duwe tembang macapat
Kang mbabar sakehing tuntunan
Bocah cilik iku anteng sangarep buku parikan
Sinambi ngaba marang biyunge
Yen wetenge kluruk njaluk diisi
Sega gudheg pinincuk kertas kanthi tulisan
“Urip iku kaya dene gudheg, ndhuk, maneka rasa dadi siji. Pralambang yen urip iki ora mung sawarna. Wedange uga mirasa. Kari milih endi kang pengen tokcecepi. Kabeh mau gumantung awakmu. Makmur lan sengsaraning urip, ginaris ing epek-epekmu. Nanging kabeh mau, bisa mbok pulasi menganggo jangkah nggayuh sakehing pepadhang ing lakumu tekane tembe”
Oseng-Oseng Mercon (Triwik Darmayanti)
Pedhes…. tambane raga kang lagi gumreges
Nyos… nyulaki gom mecah mak plonyos
Hoh hah… slenget garba mlintir gurah
Ah wuh… riwe ambrol meriang dadi ewuh
Lombok kethok ngusadani gurung ngethok
Kenyil kikil sandhung lamur kaslamur sega mawur
Bawang brambang anjamoni sakit kronis
Blimbing tomat seger salira karumat
Salam laos andudut mrentul sihing raos
Sereh dhong jeruk samadya aja kemaruk
Sarem kecap lerema jaganen pangucap
Serat Beringharja (Purwadmadi)
Banarawa binarung alas Beringan gung
Pacethokan merdusun siniti rata sedyanipun
Binale angun angun memangun
Sitihinggil srantun mucuki lenggah sinuwun
Mangku wengkon bumine Hyang Manon
Bering, rawa reja
Kurug siti bantala rata bawera
Kandhang lodhang pepulung sandhang pangan
Patrap tuna satak bathi sanak
Laku jiwa ngayogya luru leluri larasing kartya
Titi tata tentreming praja raharjane kawula
Beringharja
Mustika tandha
Linambaran siti toya
Jejeg adeging Sri Narendra
Mangku mengku kumawala
Memayu hayuning bawana
Beringharja
Peken pancawara
Pasar gedhe nagari gung binathara
Paningset jumbuhing Gusti-Kawula
Ngrenggo ngayogya koncar kuncara
Carita Kutha Ngayogyakarta (Eko Wahyu Nugroho)
Kababar sawijining carita
Carita Kutha Ngayogyakarta
Ngayogyakarta Hadiningrat kang kaloka
Kaloka endah sugih budaya
Grapyak sumanak wargane
Alus luhur bebudene
Prasaja tumindake
Gandhes luwes lan pantes agemane
Kabeh sarwa ginambar wela-wela
Gawe bungah para tamu wisata
Nalika ngancik Ngayogyakarta
Papan ayem tentrem karta raharja
Pinggir Progo ing Wayah Sore (Margaret Kusalamani)
Wayah sore ing gisike Kali Progo
Prawan sumengit lungguh amarikelu
“Ngger, putuku bocah ayu, rahayu satekamu”
Priyagung sepuh iket wulung mbagekake
Si prawan kaget, sumungkem nuli pitakon
“Panjenengan punika sinten, Eyang?”
Priyagung mau mung mesem banjur lungguh ing sandhinge
“Eyang, wonten pundi patilasanipun Eyang Wanabaya?”
“Ana apa Ngger, kowe nggoleki?”
“Kula mundhi dhawuhipun ibu swargi”
Si prawan banjur pitakon maneh
“Punapa leres Eyang Wanabaya mbalela dhumateng Mataram?”
Banjur ing mripate kang liyep lindri cumithak gegambaran
Mangir bedhah, saperangan trah Wanabaya
Oncat, sumingkir saka bumi kinasih
Ora marga wedi taker ludira, nanging ana petung seje
Kelebu leluhure, nggawa bayi abang durung genep selapan dina
Kedharang-dharang munggah gunung mudhun jurang, nyabrang kali
Bayi iku trah Wanabaya kudu slamet
Lan dheweke, trah saka bayi abang mau
Teka ing bumi Mangir ngluru leluhure
Priyagung mau kanthi asih ngelus sirahe si prawan
Mesem pait banjur pitutur,
“Ngger, manebna pikirmu, sumendhe mring Gusti
Binareng lakuning urip, kowe bakal mangerteni
Apa bedane mbangun bumi kang wis menehi panguripan
Karo mbalela lan pengin nguwasani darbeking liyan”
Sawise pitutur priyagung mau plas ilang
Si prawan kaget, usek-ucek mripat lan jelih-jelih
“Eyang… Eyang… Pnjenengan wonten pundi?”
……….
“Apa aku mau mung ngimpi”, pangudharasane
Tedhak Sinten (Kartika)
Lemah kang kokpidak sajak ora tindak-tindak
Setya tuhu kokidak-idak
Ora nate sambat kepara semanak
Nanging tangan sikil galak
Sajak kurang grapyak
Bisane amung ngrusak
Lemah, …..
Mbokmenawa ana kang salah
Anggone padha polah
Ngupadi tukon uyah
Kamangka
Wejange simbah tan bakal owah
Marang sanak kadang putu wayah
Supaya tetep manembah
Gusti Kang Maha Mirah
Tedhak siten
Ing ngendi kowe saiki?
Menawa turu, tangia aja wedi
Akeh kadang ora ngerti
Dalan tumuju bali
Kaya kang kajanji
Sadurunge mudhun ing siti
Wernane jadah kang diidak
Sajak durung mapan kepenak
Ana ati kang jenak
Nggegem paugerane kanthi kebak
Dalan wis ambyar kasampyuk gumerlape wedhak
Kang ambune wangi nyegrak
Siti, …..
Muga-muga tetep legawa ati
Dadya punjering rejeki
Marang kang sregep ngupadi
Ngebekti mring Gusti
Hamemayu hayuning bawana
Katetepi pinangka janji
Baladha Mbokdhe Setra (Nita Nuryanti)
Mbokdhe Setra bakul tela Pasar Soga
esuk ndumuk krengkat-krengket ngonthel pit tuwa
bronjong kiwa tengen isi tela sambung nyawa
nyuwak pedhut ngipatke adheme hawa
sadawane laku ndalidir cakepan tembang pinangka rowang
dhemit ora ndulit setan ora doyan
Mbokdhe Setra tan wedi nadyan dhewekan
Tekan pasar dagangan ditata sinambi ura-ura
Tembang Pangkur othak-athike kalane nganggur
Mbakyu-mbakyu tumbas napa
niki tela empuk enak tuwin legi
pulen nyamleng yen den ulu
legender amirasa
tela kaspa, tela pendhem, tela ungu
komplit pepak sarwa ana
mangga-mangga samya mriki
Mbokdhe…., Mbokdhe Setra
sampeyan kok neka-neka
ura-ura dadi sarana
rejeki mara anyaketi
kang liwat padha mampir
kang krungu melu payu
tela rong bronjong entek entong
Mbokdhe…., Mbokdhe Setra
nembanga maneh tak vidio ya
bocah gondrong nyekeli hape
Mbokdhe Setra direkam sasolah bawane
hebat Mbokdhe Setra!
top markotop Mbokdhe Setra!
Mbokdhe Setra kondhang sapasar Soga
Grimis riwis-riwis
Mbokdhe Setra mepet tritis
ngonceki tela kulakan ka desa
muji sukur mring Kang Kuwasa
wis pinaringan dalan boga
Mbokdhe…., Mbokdhe Setra
mobil kemlenyer teka
nom-noman gagah pideksa
nuduhake vidio kang jare viral
Mbokdhe Setra dijak rekaman
Mlebu tipi, ura-ura, antuk bebana
Mbokdhe Setra kaloka lan numpuk bandha
Mbokdhe Setra bakul tela pasar Soga
kudune seneng gumyak gumbira
geneye mbrebes mili keranta-ranta
anak putu ana ngendi
budaya Jawa ayo dirungkepi
Kadang Bakul Pasar Bantul (Dalle Dalminto)
Bagaskara ing brang wetan durung methungul
Ngatonake praupan lan sunare njedhul
Bun esuk isih pating grandul
Ing pucuking godhong lan grumbul
Para kadang bakul cancut sengkut
Mecaki dalan miyak kandele pedhut
Gumregah ngangkah jangkah
Gumbregut nekuk dengkul lan sikut
Hawa adem nyocoki kulit ari
Kadya lincip dan landhepe eri
Ora bakal gawe gigrige ati
Semangat kadhung anjenggirat
Tinalenan niat
Beburu berkat sing sumebar ing jagad
Ing Pasar Bantul
Para kadang bakul ngebaki wakul
Jumangkah nyadhong berkah
Kanthi ati pasrah sumarah
Mantra Pengasihan (Suwarsidi)
Sun wateg mantra pengasihan
Sih asih asah asuh
Sing asih bakal antuk sembulih
Sing asah tansah antuk landheping galih
Sing asuh bakal kaleksanan sakehing penggayuh
Iki mantra pengasihan
daktamakake mring sasama ing saindhenging donya
dimen raharja tebih saking sadaya balak pikolehing tumindaksing
tindake dur bakal lebur
sing tindake utama bakal oleh begja
sing prawira bakal dhuwur pangkatnya
Mantra iki mantra pengasihan wisiking Pangeran
Pangeranku, Pangeranmu, sesembahan kawula sawektu-wektu
Pengasihan kebak rasa sih tresna-tinresnanan
Sih sih sih asih,
Tentrem, trem trem mrih ati rasa ayem
Suh, suh, suh…..
tumindak aja gawe rusuh
tindak rusuh gawe susah sawayah-wayah
hemmm…
kuwat slamet, najan katone mung gremat-gremet
nanging nganggo petung sarwa memet
met-met-met slamet
kanthi mripat merem dhipet
nora nyawang ngiwa, nyawang nengen, nyawang munggah tuwin mudhun
pandulu mung tumuju maju
maju-maju-maju-ju-ju-ju
sih-sih-sih
sing asih oleh sembulih
sing welas mantas saking rasa was-was
sing tresna atine tansah rena
hemmm…
tampanana mantra pengasihan
mugi Pangeran paring kasembadan
Murni (Albertus Sartono)
ora paedah memacak satria
lamun galihe asura
apaana guna pepaes pandhita
lamun sejatine durjana
endi gunane esem guyu
lamun kabeh mau mung palsu
ukara lan tembung-tembung manis
ilang tegese lamun tenane mung lamis
gedhe rumangsa ndaku wong prawira
tanpa pakra lamun sabenere culika
pepacak nyenyandhang setrikan lunyu
nyingidake awak sing tumindak saru
wedhakan kandel katon lucu
mung kanggo nutupi kadhas lan panu
api-api engkak-engkok laku becik
mung merga nggendhong melik
api-api ribut ribet ubeg rowang
tundhane mung arep mbebidhung
wasis micara teteh ngethuprus
jebul isine mung nggedebus
lamun ati nurani tanpa murni
mawohe duraka, pageblug, utawa pepati
sliramu milih sing endi
Jathilan (Agus Suprihono)
Cemethi cumether ing kuping
Nlusup-nlusup saraf kasadharan
Ngliwati lad-ladan rumpil
Ing sirah nyawiji ing rah
Swara bendhe mengungkung
Ngundang sakabehing bebungah
Nundhung sakehing dredah
Ingsun lilani sira angslup ing raga
Kareben padha surak mawuran
Lan panjeriting prawan-prawan
Iki raga paringane Allah
Dakpepetri murih aja duwe laku salah
Iki sukma aja nganti sumisih ngalah
Ing jaman kang padha ngajab supaya kalah
Sinta Obong (Agus Suprihono)
Dakdilat pucuking agni
Dakgendhong takdiring pepesthi
Tan winates telenging ati
Lir gumanti kumlebating pepati
Dhuh Dewa pangwasaning langit lan bumi
Muga kaseksenana iki kasetyaning ati
Kang ora kendhat tansah mbanyu mili
Dakuji kanthi ngrungkebi kobaraning geni
Dhuh gurulaki kang daktresnani nganti trusing ati
Nadyan katresnanmu durung sakuku irenge Rahwana
Kang ora mredhuli najan wis ora suci
Geneya kowe tidha-tidha marang sempalaning nyawa
Kang kudu daklakoni sawise uwal saka Rahwana
Mbuktekake kasucianku marang panasing geni?
Basa Tanpa Ukara (Dwi Winarno)
Tan perlu ukara ngambra
Kanggo lare kang nerak subasita
Tumindak kurang trep, luput keladuk saru
Sangarep tamu, sesepuh utawa pangarsa praja
Ulat lan sorot netra kanggo ngelikake
Tanpa lingsem kanggone lare
Krasa lan banjur rumangsa
Metani luputingsun,
Banjur kudu kepiye
Kanthi tlaten paring wewarah uga tuladha
Iki pinangka gambaran nyata
Adab budaya adiluhung kang kudu kajaga
Kemis Pahing (Christina Sri Purwanti)
Gedhe-cilik, enom-tuwa
Saking dhusun dalasan kitha
Waradin ing tlatah Ngayogyakarta
Mring kantor lan pawiyatan sadaya
Kakung miwah putri kapatah sami
Tan miwang dinuta nguri-uri
Sinartan raos handarbeni
Sesarengan angadi busana Jawi
Warisan leluhur kang adiluhung
Pri putri angagem nyamping mbayak rikma ginelung
Bebed surjan iket blangkon kakungipun
Mrih tan supe wosing busanananipun
Kemis Pahing pinilih samya
Ginayut hadegnya Kraton Ngayogyakarta
Swasana bombong tumekaning nala
Sinawang resep lan sampurna
Nyamping lan bebed bathik gagrag Ngayogyakarta
Mbayak ugi surjan sumangga kersa
Pinareng angagem maneka warna
Abang, ijo, kuning, polos, corak kasumangga
Kewes gandhes luwes sing wanita
Pambeg gagah lan pideksa kang jalu
Sangsaya kaya rese ping pandulu
Layang Kanggo Emak (Mulyati)
Mak, sliramu anyeksèni kridhaning aji kabudayan manungsa Jawi
tansah uga cinathet sesuluh hamemayu hayune nagara iki
wiwit saka jaman Kartini
kenceng ancas ing nguni:
sluman-slumun yasa dadi ramu
lembah manah tansah dadi sangu
“Aja ketungkul marang kalungguhan, kadonyan, lan kamareman
aja gumunan, aja getunan, aja kagètan, aja aleman
aja pisan-pisan gumun angadhepi mompyoré jaman iki
aja getun jroning panemu kang becik
aja kagèt kabèh iku mung pethingan
aja aleman ginayuh nyandhak sesawangan kekarepan”
Mak, senajan aku wong dhusun
wiwit cilik tansah nelangsa lan getun
pakaryanku mung tandur karo matun
nanging ora kendhat anggonku dikon kèri
sabab akèh sawan manis sing tansah mbebayani
Mak, najan pangkat luwih cilik, urip butuh diajèni
sing kudu kasinau, bab bakuné kadewasan dhiri
dadia wong kang piguna
rawé-rawé pait getirira dèn rantasi
ngadeg jejeg ora pijer miyar-miyur
sarwa ndedonga kabèh kagungane Ingkang Maha Widhi
Mak, sembah sujud tambahing pangèstu
aku amung saderma
ora nékad mring kang ala
kabèh iku merga ati rinasa prungsang
laras pénak lamun suci
kanggo pathokan gesang
tata tentrem lair kalawan batin
Nglembah Manah (Suyati)
Ngger, lamun kowe micara nganggowa tata
Tatane tembung kang rinakit duwe makna
Miliha tembung kang becik dirungokake
Singkirana tembung kasar lan saru
Kareben adoh saka panacad uga panyendhu
Kang nuwuhake rasa ora kepenak ing ati
Utawa gawe kuping rinasa grisi
Winedhar ing ukara kaucap ing suwara
Ucapna kanthi lembut lan alon
Aja nggetak aja keseron
Sinartan patrap kang prayoga
Netepi werdining subasita
Datan nyingkur saka tatakrama
Ngger, sanajan mung saklimah tembung
Upayanen murih ora gawe bingung
Sakecap tembung kang kawedhar
Bisa gawe greged tansaya makantar
Bisa aweh panglipur kang nandhang branta
Bisa dadi pamuji urip raharja
Nah, itulah pemaparan singkat mengenai Contoh Geguritan Bahasa Jawa. Grameds dapat mengunjungi koleksi buku Gramedia di www.gramedia.com untuk memperoleh referensi tentang karya-karya sastra selain contoh geguritan bahasa Jawa.
Berikut ini rekomendasi buku Gramedia yang bisa Grameds baca untuk mempelajari tentang aliran kepercayaan di Jawa agar bisa memahaminya secara penuh. Selamat membaca.
Temukan hal menarik lainnya di www.gramedia.com. Gramedia sebagai #SahabatTanpaBatas akan selalu menampilkan artikel menarik dan rekomendasi buku-buku terbaik untuk para Grameds.
BACA JUGA:
- Biografi Ir. Soekarno, Sang Proklamator Kemerdekaan Indonesia
- Biografi Sultan Ageng Tirtayasa: Riwayat Hidup dan Perjuangannya
- Biografi W.R. Supratman, Sang Pencipta Lagu Indonesia Raya
- Pasca Proklamasi, Mengapa Bangsa Indonesia Harus Mempertahankan Kemerdekaan?
- Sejarah dan Makna Proklamasi Kemerdekaan bagi Indonesia
